4 ліпеня 1944 г. у баях за вызваленне Чэрвеньшчыны вызначыўся камандзір артылерыйскай батарэі 4-й асобнай супрацьтанкавай брыгады капітан Георгій Піліпавіч Барыкін, Герой Савецкага Саюза.
Перад батарэяй Барыкіна была пастаўлена задача не дапусціць прарыву варожых войск з акружэння ў паўночнай частцы Чэрвеньскага раёна, недалёка ад вёскі Сітнік. 4 ліпеня на досвітку на ўчастку батарэі капітана Барыкіна вораг кінуў на прарыў значныя сілы, але артылерысты стаялі насмерць, агнём гармат і аўтаматаў знішчалі ворагаў.
Калі варожая пяхота падыйшла ўшчыльную да рубяжа, які займала батарэя, у ход пайшлі гранаты, завязаўся рукапашны бой. Загінуў увесь разлік гармат, у жывых засталіся толькі Барыкін са сваім ардынарцам Паўлавым. Барыкін ва ўпор пачаў расстрэльваць варожых салдат з пісталета, але быў скошаны аўтаматнай чаргой. Воіны батарэі капітана Барыкіна і камбат пахаваны на гарадскіх могілках у Чэрвені.
